Bale, WALA

At gagawin na rin kitang akda 

Katulad ng iba pang dumaan, tumigil, at lumakad

Magiging bahagi ka na ng pananatili ko sa mundo

At isusulat ko na naman ang bagong pangalan sa listahan ko ng mga sawi

Wala kang alam, walang nangyari

Walang bago, walang luma, wala lahat

Ang tanging pag-asa ay wala,

Ang tanging kwento natin ay lalong walang-wala

Hindi mo malalaman dahil hindi ko rin naman isasalita

At wala kang aasahan, katulad ng natutunan ko sa'yo

Sapat na ang hapding nararamdaman KO

Oo, inako ko na nang di ka matulad nila,

   silang matapos manakit ay mataman pang manumbat

"Ako naman ngayon," sambit ko sa kawalan

Kalakip ng pag-asang sana ,sana sila naman ang masaktan

Nakakapagod ang paikot ikot ko sa yugtong ito

Ayaw ko man sanang sukuan ka at 

Kung sana napanindigan ko ang mga salita, diba?

Pero alam mo ang masakit?

Mahirap magmahal mag-isa

Siguro naman alam mo na di sasapat ang pagmamahal ko sa ating dalawa

Alam kong may puso ka rin ,siguro?

Pero wag ka na munang mag-abala

Pramis.

Alam kong sinira ka niya at di mo nga kayang bumitiw sa kanya

Naiintindihan kita.

Patawad kung di kita kayang ayusin, ah

Mahahanap mo rin siya

Di na muna ako titigil sa pabaliktad na ikot ng mundo, sa kinagisnan mo

Iiyak muna ako hanggang sa maluwagan ko ang pisi sa pabalik na pagkabig ko nang paulit-ulit para mapalapit ka dito

Kahit anong gawin ko, wala ring halaga

Dahil masusunod ka, panigurado

Maghihintay pa sana ako, mahal, kaso mukhang may lakad ka pa

Oo, minahal na siguro kita

Wag kang mag-alala, alam ko, mahal, ang mga salitang aking nahulma

Pero di na 'ko aasa pa

Masakit mabalewala.